Archive

Archive for the ‘ප්‍රවෘත්ති’ Category

ශ්‍රී ලංකාවට පළමු වරට පරිගණකයක් ගෙනා ‘නාත් ‘ දිවි මගෙන් සමුගනී

November 23rd, 2017 Comments off
ශ්‍රී ලංකාවට පළමු වරට පරිගණකයක් ගෙනා පුද්ගලයා ලෙස සැළකෙන ආචාර්ය නාත් අමරකෝන්  ඊයේ  (22)අභාවප්‍රාප්ත වුණා.

කොළඹ ආනන්ද විද්‍යාලයෙන් පාසැල් අධ්‍යාපනය ලබා කොළඹ විශ්ව විද්‍යාලයේ ඉංජිනේරු පීඨයෙන් සිවිල් ඉංජිනේරු උපාධියක් ලැබූ ඔහු

සහකාර කථිකාචාර්යවරයකු ලෙස වෘත්තීය ජීවිතය ආරම්භ කරනු ලැබුවා.

පසුව ප්‍රසිද්ධ වැඩ දෙපාර්තමේන්තුවේ සහකාර ඉංජිනේරුවරයකු වූ  නාත් අමරකෝන්, ආචාර්ය උපාධිය ලද්දේ ලන්ඩන් විශ්ව විද්‍යාලයෙන්.

පසු කලෙක ඉංජිනේරු සංස්ථාවේ පර්යේෂණ අංශයේ ප්‍රධාන තනතුරට පත්වූ ඔහු එමගින්  මහත් සේවාවක් ඉටු කළා.

වෘත්තීයවේදීන්ගේ සංවිධානය,රාජ්‍ය සංස්ථා ඉංජිනේරු නිලධාරීන්ගේ සංගමය, ශ්‍රී ලංකා බෞද්ධ පෙරමුණ සංවිධානය, විද්‍යාඥයින්ගේ සහ තාක්ෂණ සේවකයින්ගේ සංගමය, සමස්ත ලංකා විහාරාධිපති සම්මේලනය, සනාතන පදනම, එක්සත් සිංහල මහා සභාව ආදියේ ආරම්භක සාමාජිකයා ඔහුයි.

මියයන විට ඔහු  82වන වියේ පසුවූවා.



Categories: ප්‍රවෘත්ති Tags:

sri lanka cricket

November 23rd, 2017 Comments off
ඉන්දියාව සමග පැවැත්වෙන එක්‌දින ක්‍රිකට්‌ තරගාවලියේ සිට ශ්‍රී ලංකාවට නව එක්‌දින නායකයකු පත්කිරීමට ශ්‍රී ලංකා ක්‍රිකට්‌ තේරීම් කමිටුවේ අවධානය යොමුව තිබෙන අතර අදාළ පත්කිරීම් ලබන 30 වැනිදා සිදුකිරීමට නියමිතය.

ඒ අනුව ශ්‍රී ලංකාවේ නව එක්‌දින නායකත්වය සඳහා ඇන්ජලෝ මැතිව්ස්‌,
නිරෝෂන් දික්‌වැල්ල සහ ළහිරු තිරිමාන්නව යෝජනා වී ඇති අතර දිනේෂ් චන්දිමාල්ගේ නමද ඒ අතර වේ. කෙසේ වෙතත් චන්දිමාල්ගේ එක්‌දින තරග පිති ප්‍රහාරයේ ප්‍රහාරාත්මක වේගය හුවා දක්‌වමින් ඔහුට නායකත්වය ලබාදීම සම්බන්ධයෙන් ඇතැමුන්ගේ විවිධ මත පළවී ඇති බවද සඳහන් වේ. කෙසේ වෙතත් නව නායකයා පත් කිරීම සම්බන්ධව ඉදිරියේදී වැඩ භාර ගැනීමට නියමිත පුහුණුකරු චන්දික හතුරුසිංහ සමගද සාකච්ඡා කිරීමට ශ්‍රී ලංකා ක්‍රිකට්‌ බලධාරීන් සහ තේරීම් කමිටුව කටයුතු යොදනු ඇතැයි වැඩි දුරටත් වාර්තා වේ.

ගතවූ මාස 11 තුළදී ශ්‍රී ලංකාව සහභාගි වූ එක්‌දින තරග 26 කදී පරාජයන් 21 ක්‌ ලබා ඇති අතර ජය ගෙන ඇත්තේ තරග 4 ක්‌ පමණි. ජය ගත් තරග හතර සිම්බාබ්වේට තරග දෙකක්‌, බංග්ලාදේශයට එක්‌ තරගයක්‌ සහ ඉන්දියාවට තරගයක්‌ වශයෙන් ලබා තිබේ. මේ වන විට ශ්‍රී ලංකාව පිට පිටම එක්‌දින තරග 12 ක්‌ පරාජයට පත්ව තිබේ. එක්‌දින තරග පහකින් සමන්විත තරගාවලි තුනක්‌ වසරක්‌ තුළදී 5-0 ක්‌ වශයෙන් (දකුණු අප්‍රිකාවට, ඉන්දියාවට සහ පාකිස්‌තානයට) පරාජයට පත්වූ ලොව එකම කණ්‌ඩායම බවටද ශ්‍රී ලංකාව පත්විය.

එක්‌දින පරාජයන් රැල්ල නවතා ගනිමින් 2019 ලෝක කුසලාන ඉලක්‌කය වෙනුවෙන් ස්‌ථිර නායකයකු පත්කිරීමට ග්‍රැහැම් ලැබ්බ්‍රොයිගේ නව ක්‍රිකට්‌ තේරීම් කමිටුව පියවර ගෙන තිබේ. ඒ අනූව හිටපු නායක ඇන්ජලෝ මැතිව්ස්‌ට යළිත් ශ්‍රී ලංකාවේ එක්‌දින නායකත්වය ලබාදීමට වැඩි අවධානයක්‌ යොමුව තිබෙන අතර ඊට අමතරව ළහිරු තිරිමාන්න, නිරෝෂන් දික්‌වැල්ල සහ දිනේෂ් චන්දිමාල් කෙරෙහිද තේරීම් කමිටුවේ අවධානය යොමුව ඇතැයි ආරංචි මාර්ගවලින් වාර්තා වේ.

2019 ඉලක්‌කයට යන ශ්‍රී ලංකා එක්‌දින කණ්‌ඩායමේ නායකයා කවුරුන්ද යන්න ක්‍රිකට්‌ තේරීම් කමිටු සභාපති ග්‍රැහැම් ලැබ්බ්‍රොයි මහතාගෙන් විමසන ලදුව, ”අපි එකදිගට එක්‌දින තරග පරාජය වෙනවා. ඒ නිසා අලුත් නායකයකු පත්කරන්න කටයුතු කරනවා. ලබන 30 වැනිදා නව නායකයා පත්කරනවා. ඉන්දියානු සංචාරයට යන්නෙ නව නායකයෙක්‌.” යනුවෙන් පැවසීය.

වත්මන් ශ්‍රී ලංකා එක්‌දින කණ්‌ඩායමේ නායකත්වය ලබාදීමට සුදුසු ජ්‍යෙෂ්ඨයන් ලෙස ඉතිරිව සිටින්නේ ඇන්ජලෝ මැතිව්ස්‌, දිනේෂ් චන්දිමාල් සහ ළහිරු තිරිමාන්න පමණි. ක්‍රිකට්‌ තේරීම් කමිටු සභාපතිවරයාගෙන් හිටපු නායකයාට යළිත් එක්‌දින නායකත්වය ලබා දීමට සූදානම්ද යනුවෙන් විමසන ලදුව, ”අපිට පසුගිය දේවල් වැඩක්‌ නැහැ. කණ්‌ඩායමේ විනය සහ දක්‍ෂතාවය තියෙනවනම් හොඳම කෙනාට නායකත්වය ලබා දෙනවා. ඇන්ජලෝ මැතිව්ස්‌ට වුණත් අපි නායකත්වය ලබාදෙන්න සූදානම්. මොකද මේ පරාජයන් නවත්වලා 2019 වන තෙක්‌ හොඳ නායකයකු පත් කරන්න ඕන. නම් කිහිපයක්‌ තියෙනවා. ඒ අනුව හිටපු නායකයා කියල නැහැ සුදුසුම කෙනාට අපි නායකත්වය ලබා දෙනවා. ඒ ගැන තවම ස්‌ථිර තීරණයක්‌ අරගෙන නැහැ.” යනුවෙන් පැවසීය.

ශ්‍රී ලංකා ක්‍රිකට්‌ කණ්‌ඩායමේ නායකයා ලෙස කටයුතු කළ ඇන්ජලෝ මැතිව්ස්‌ සිම්බාබ්වේ කණඩායම සමග ජුනි මාසයෙ පැවැති එකදින තරගාවලිය 3-2 ක්‌ ලෙස පරාජයට පත්වීමෙන් පසුව නායකත්වයෙන් ඉවත් විය. අනතුරුව ටෙස්‌ට්‌ කණ්‌ඩායමේ නායකත්වයට දිනේෂ් චන්දිමාල්වත් එක්‌දින සහ විස්‌සයි විස්‌ස නායකත්වයට උපුල් තරංගවත් පත් කරන ලදී.

ශ්‍රී ලංකාව වෙනුවෙන් එක්‌දින තරග විස්‌සකට වැඩිය නායකත්වය ලබාදුන් ක්‍රීඩකයන් අතර ජයග්‍රාහී ප්‍රතිශතය 50% කට වැඩිය රඳවා ගත් නායකයන් සිටින්නේ පස්‌දෙනෙකි. ඉන් එක්‌ අයකු ඇන්ජලෝ මැතිව්ස්‌ය. මැතිව්ස්‌ එක්‌දින තරග 98 කට නායකත්වය දී තරග 47 ක්‌ ජයග්‍රහණය කරා මෙහෙයවා අතර එහි ජයග්‍රාහී ප්‍රතිශතය 51.07% කි.


Categories: ප්‍රවෘත්ති Tags:

අසත්‍ය ප්‍රචාරය කරන වෙබ් අඩවි ගැන CID විමර්ශන !

November 23rd, 2017 Comments off
අසත්‍ය ප්‍රචාර පතුරවන වෙබ් අඩවිවලට එරෙහිව අපරාධ පරීක්‍ෂණ දෙපාර්තමේන්තුව පරීක්‍ෂණයක්‌ ආරම්භ කර ඇතැයි පොලිස්‌ මාධ්‍ය ප්‍රකාශක පොලිස්‌ අධිකාරී රුවන් ගුණසේකර මහතා ඊයේ (22 දා) පැවැසීය.

මෑතකදී ගිංතොට ඇතිවූ සිද්ධිය වර්ධනය කිරීමට ඇතැම් වෙබ් අඩවි
පාදක වී ඇති බවට හෙළිවී ඇති බවත් එම වෙබ් අඩවි හරහා අසත්‍ය පතුරවනු ලැබූ පිරිස්‌ සම්බන්ධයෙන් අපරාධ පරීක්‍ෂණ දෙපාර්තමේන්තුව මේ වනවිට පරීක්‍ෂණ ආරම්භකර ඇති බවත් ඊයේ (22 දා) කැබිනට්‌ මාධ්‍ය හමුවට එක්‌වෙමින් පොලිස්‌ මාධ්‍ය ප්‍රකාශකවරයා කියා සිටියේය.

මෑතකදී ගිංතොට සිද්ධිය සහ පෙට්‍රල් හිඟයක්‌ ඇති බවට අසත්‍ය ප්‍රචාර ගණනාවක්‌ සිදු කළ අය සම්බන්ධයෙන් ආරම්භ කර තිබෙන විමර්ශනවලදී හෙළිවන පුද්ගලයන්ට එරෙහිව අධිකරණය වෙත කරුණු ඉදිරිපත් කර දැඩි දඬුවම් ලබාදීමට අදහස්‌ කර ඇතැයි ද ඒ මහතා කීය.

විශේෂ පනතක් යටතේ නඩු :

විශේෂයෙන් ගිංතොට සිද්ධිය සම්බන්ධයෙන් අසත්‍ය ප්‍රචාර පතුරවා හැරීම සම්බන්ධයෙන් චෝදනා එල්ල වන පුද්ගලයන්ට එරෙහිව සිවිල් හා දේශපාලන අයිතිවාසිකම් පිළිබඳ අන්තර් ජාතික සම්මුති පනත යටතේ නඩු පවරන බව ද ඒ මහතා කීය.

මෙම පනත යටතේ චෝදනා ලබා බන්ධනාගාරගත වන පිරිසට ඇප ලබා ගැනීමට මහෙස්‌ත්‍රාත් අධිකරණයකින් නොහැකි බවත්, ඔවුන් සාධාරණ හේතු දක්‌වා මහාධිකරණයකින් ඇප ලබාගත යුතු බවත් ඒ මහතා කීය.

ගිංතොට සිද්ධිය සම්බන්ධයෙන් මේ වනවිට 20 දෙනකු අත්අඩංගුවට ගෙන මේ මස 30 දක්‌වා බන්ධනාගාර ගතකර සිටින බවත් ඔවුන්ට ඇප ලබාගැනීම මහාධිකණයෙන් සිදුවිය යුතු බවත් පැවැසූ රුවන් ගුණසේකර මහතා ගිංතොට සිද්ධිය මේ වනවිට සියයට සියයකින් සමථයකට පත්ව ඇති බවත් පැවැසීය.


Categories: ප්‍රවෘත්ති Tags:

උතුරේ ඝාතනය වුවන් වෙනුවෙන් ස්මාරකයක් !

November 23rd, 2017 Comments off
වසර 2009 දී යුද්ධය අවසන් වූ පසු ආරක්ෂක අංශ විසින් එල්.ටී.ටී.ඊ. මහවිරු සොහොන් ඉවත් කළද එසේ ඉවත් කරන ලද සොහොන් කොත් එකතු කොට කිලිනොච්චිය කනකපුරම් ප්‍රදේශයේ ස්මාරකයක් ඉදිකොට ඇත.

මියගිය මහවිරුවන් වෙනුවෙන් නොවැම්බර් මස 27 වැනිදාට යෙදෙන
මහවිරු දිනයේ උතුරු පළාත් ප්‍රධානතම මහවිරු සැමරුම සිදු කෙරෙන කිලිනොච්චිය කනකපුරම් ප්‍රදේශයේ මෙම ස්මාරකය නිර්මාණය කොට ඇත.

මෙහි එක් සංවිධායකවරයකු වශයෙන් දෙමළ ජාතික සන්ධානයේ පාර්ලිමේන්තු මන්ත්‍රි එස්. ශ්‍රී ධරන් මහතාද කටයුතු කරයි.

මියගිය මහවිරුවන් වෙනුවෙන් සිහිකිරීමට දැනට ඉතිරිව ඇති එකම සිහිවටන ඉවත් කරන ලද මහවිරු සොහොන් කෑලි හෙයින් එම සොහොන් කොටස් යොදා මෙම ස්මාරකය සෑදීමට මන්ත්‍රිවරයා ඇතුළු පිරිසක් විසින් පියවර ගෙන ඇත.

මේ අතර 27දාට යෙදෙන මහවිරු දිනයට සමගාමීව මහවිරු සතිය පෙරේදා (21දා) සිට යාපනය සරසවියේ ඇතුළු උතුරු පළාතේ ස්ථාන කීපයකදීම ආරම්භ කොට ඇත.

සටනේදී මියගිය තම පක්ෂ සාමාජිකයින් සැමරීමට කැරලි දෙකකට දායකවූ දකුණේ ජවිපෙ අවස්ථාව හිමිවුදව උතුරේ ජනතාවට මෙතෙක් එම අවස්ථාව ලැබී නොමැත.

තම තමන්ගේ වීරයන් සැමරීමට හැමෝටම අයිතියත් තිබේ. ඒ මිනිස් අයිතිය දකුණට මෙන්ම උතුරටත් හිමිවිය යුතුය.

ඡායාරූප - මාධව කුලසූරිය

Categories: ප්‍රවෘත්ති Tags:

සුදු වෑන් රියකින් යාපනයේ තරුණයකු පැහැරගෙන !

November 23rd, 2017 Comments off
යාපනය ප්‍රදේශයේදී සුදු වෑන් රථයකින් තරුණයෙකු පැහැරගෙන ගොස් ඇත. මෙලෙස පැහැරගෙන ගොස් ඇත්තේ යාපනය කෝපායි ප්‍රදේශයේ පදිංචි 25 හැවිරිදි තරුණයෙකි.

රෙදි පිළි වෙළඳ සැළක සේවයේ නිරත ඔහු සේවය නිමවා යළි නිවසට පැමිණෙන අතරතුර පැහැරගෙන ගොස් ඇති බව පවුලේ සාමාජිකයින්
පොලිසියට පැමිණිලි කර තිබේ.

යාපනය පොලිසිය මේ පිළිබඳ වැඩිදුර විමර්ශන ක්‍රියාත්මකයි.

- නෙත් නිව්ස්


Categories: ප්‍රවෘත්ති Tags:

ඩොලර් මිලියන 23.57ක මහ කන්නයේ යූරියා ටෙන්ඩරය JAT ට

November 22nd, 2017 Comments off
2017/2018 මහ කන්නය සඳහා රජයේ පොහොර සමාගම් මඟින් බෙදාහැරීම පිණිස අවශ්‍ය යූරියා මෙට්‍රික් ටොන් 72,000ක් මිල දී ගැනීම සඳහා වූ ටෙන්ඩරය, ඒ සඳහා සාර්ථක ලංසුව ඉදිරිපත් කරනු ලැබ ඇති JAT Holding (Pvt) Ltd. වෙත මෙට්‍රික් ටොන් එකක් ඇමරිකානු ඩොලර් 327.40ක් බැගින් ඇමරිකානු ඩොලර් මිලියන 23.57ක මුදලකට පිරිනැමීම පිණිස කෘෂිකර්ම අමාත්‍ය දුමින්ද දිසානායක මහතා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.

ආසන්න වශයෙන් මෙම ටෙන්ඩරයේ වටිනාකම රුපියල් දශ ලක්ෂ 3,500 කි.
Categories: ප්‍රවෘත්ති Tags:

මංගලගේ මංගල අයවැයෙන් අඩුකළ ‘බියර් මිළ’ යළි ඉහළට..

November 22nd, 2017 Comments off
මුදල් අමාත්‍ය මංගල සමරවීර මහතා බියර් මිල අඩුකිරීමට අයවැයෙන් ඉදිරිපත් කළ යෝජනාව  වෙනස්වීමට ඉඩ තිබෙන බව රජයේ කැබිනට් සම ප්‍රකාශක අමාත්‍ය රාජිත සේනාරත්න මහතා පැවසීය. 

මේ සම්බන්ධව වෛද්‍ය සංගම් ඇතුළු විවිධ පාර්ශ්ව විරෝධය පළ කර තිබෙන බැවින් ඒ  සම්බන්ධව  ජනාධිපති මෛත්‍රීපාල සිරිසේන මහතා සමඟ දීර්ඝව සාකච්ඡා කළ බවද ඇමතිවරයා සඳහන් කළේය. රජයේ ප්‍රවෘත්ති දෙපාර්තමේන්තුවේදී අද (22දා) පැවැති රජයේ කැබිනට් තීරණ දැනුම්දීමේ මාධ්‍ය හමුවට එක්වෙමින් ඒ මහතා මෙසේ පවසා සිටියේය. එහිදී වැඩිදුරටත් අදහස් දැක්වූ  අමාත්‍යවරයා පවසා සිටියේ  අයවැය තුන්වැනි වර කියවා සම්මත කරන අවස්ථාව වනවිට බියර් මිල යළිත් වැඩිවීමට ඉඩ  ඇති බවයි.

කොළඹ විශ්වවිද්‍යාලයෙන් සිදුකළ පර්යේෂණයක ප්‍රතිඵල  අනුව  බියර් මිල අඩුකර ඇතැයි අයවැය මගින් ප්‍රකාශ වුවද එක්තරා මහාචාර්යවරයෙකු විසින් පෞද්ගලිකව ලබාදුන් වාර්තාවක් අනුව එම තීරණය ගෙන ඇති බවත්, ලෝකයේ කිසිම රටක බියර් මිල අඩු කළ විට සැර මත්පැන් පරිභෝජනය අඩුවීමක් සිදුවී නොමැති බවද පවසා සිටියේය.
Categories: ප්‍රවෘත්ති Tags:

රට හැරගිය අනිකා විජේසූරියට යළිත් ශ්‍රී ලංකාවට එන්න වේ

November 22nd, 2017 Comments off
දුරකතන දත්ත පරික්ෂා කිරීම තුළින් පාර්ලිමේන්තු මන්ත්‍රීවරුන්ගේ වරප්‍රසාද කිසිඳු අයුරකින් කඩ වී නොමැති බව පාර්ලිමේන්තු මන්ත්‍රී වාසුදේව නානායක්කාර පවසයි.

නිවේදනයක් නිකුත් කරමින් පාර්ලිමේන්තු මන්ත්‍රී වාසුදේව
නානායක්කාර මේ බව පැවසී ය. බැඳුම්කර වංචාව සම්බන්ධයෙන් පත් කර ඇති ජනාධිපති කොමිසම විසින් පරික්ෂා කර බලා ඇත්තේ අර්ජුන් මහේද්‍රන්ගේ ජංගම දුරකතනය බවත් මන්ත්‍රීවරුන්ගේ දුරකතන පරික්ෂා කර නොමැති බවත් ඔහු ප්‍රකාශ කරයි.

මෙම තොරතුරු අනාවරණය කිරීම සඳහා ක්‍රියා කළ නිලධාරීන්ට විරුද්ධව පොලීසියේ ඉහළ නිලධාරීන් විසින් යම් පරික්ෂණයක් ආරම්භ කර ඇති බවට තොරතුරු ලැබී ඇති බවත් මේ තුළින් කොමිසමට අභියෝග කර ඇති බවත් ඔහු ප්‍රකාශ කරයි.

රවී කරුණානායකට අර්ජුන් ඇලෝසියස් නිවසක් මිල දී ගැනීම සම්බන්ධයෙන් තොරතුරු අණාවරණය කළ අනිකා විජේසුන්දර කොමිසමේ දැනුම් දීමක් අනුව නැවත අද (22) දින ලංකාවට පැමිණෙන බවත් පොලීසියේ ඉහළ නිලධාරීන්ගේ දැනුම්දීම අනුව ඇයගේ ආරක්ෂාව සඳහා සිටි නිලධාරීන් ද ඉවත් කර ඇති බවත් එම නිවේදනයේ වැඩිදුරටත් සඳහන් වේ.



Categories: ප්‍රවෘත්ති Tags:

බංගලාදේශය හැරදා හතුරු සද්ද නැතුවම ලංකාවට ඇවිත් – එවෙලෙම ක්‍රිකට් ආයතනයට ගොස් මහ රෑ වෙනකං සාකච්ඡා කරලා..!

November 22nd, 2017 Comments off
බංග්ලාදේශ ක්‍රිකට් කණ්ඩායමේ හිටපු ප්‍රධාන පුහුණුකරු චන්දික හතුරුසිංහ මහතා ඊයේ (21දා) පස්වරුවේ ශ්‍රී ලංකාවට පැමිණි බව ශ්‍රී ලංකා ක්‍රිකට් අභ්‍යන්තර ආරංචි මාර්ග පවසයි.

චන්දික හතුරුසිංහයන් පිළිබඳ පසුගිය සමයේ විශාල වශයෙන් කතාබහට
ලක්වූ අතර,ශ්‍රී ලංකා ක්‍රිකට් කණ්ඩායමේ මීළඟ ජාතික පුහුහුණුකරු ලෙස වැඩ භාරගැනීමට නියමිතව සිටියි.

 ශ්‍රී ලංකාවට පැමිණි විගස ඒ මහතා ශ්‍රී ලංකා ක්‍රිකට් මූලස්ථානය වෙත ගොස්  වත්මන් ක්‍රිකට් පරිපාලනය සමග දීර්ඝ සාකච්ඡාවක් සිදුකර ඇතැයිද , එම සාකච්චා මධ්‍යම රාත්‍රිය වනතෙක් පැවති බවද එම ආරංචි මාර්ග සඳහන් කරයි.

මේ වනවිට හතුරුසිංහ, ශ්‍රී ලංකා ක්‍රිකට් ප්‍රධාන පුහුණුකරු ධුරය භාරගැනීමට සිය එකඟතාව පළකර ඇති අතර, ඒ අනුව ඉන්දීය සංචාරයෙන් අනතුරුව පැවැත්වීමට නියමිත එක්දින තරග 03කින් යුත් ශ්‍රී ලංකා කණ්ඩායමේ බංග්ලාදේශ සංචාරයේදී ඔහු ප්‍රධාන පුහුණුකරු ධුරයේ වැඩභාරගැනීමට නියමිත බවද වාර්තා වේ.

චන්දික හතුරුසිංහ ප්‍රධාන පුහුණුකරු ධුරයට පත්වීමත් සමග මේ වනවිට අතුරු පුහුණුකරු ලෙස කටයුතු කරන නික් පෝතාස් යළිත් පන්දු රැකීමේ ධුරයේ කටයුතු කිරීමට නියමිත බව වාර්තා වේ.

චන්දික හතුරුසිංහ කලක් (කුමාර් සංගක්කාර ශ්‍රී ලංකා ක්‍රිකට් කණ්ඩායමේ නායකත්වය දරන සමයේ) ශ්‍රී ලංකා කණ්ඩායමේ පුහුණුකරුවෙකු ලෙස කටයුතු කළ අතර, පසුව බංග්ලාදේශ ක්‍රිකට් කණ්ඩායමේ ප්‍රධාන පුහුණුකරු ලෙස වැඩ භාර ගත්තේය.

හතුරුසිංහ බංග්ලාදේශ කණ්ඩායමේ පුහුණුකරු ධුරයට පත්වීමෙන් අනතුරුව බංග්ලාදේශ කණ්ඩායම ආසියාවේ මෙන්ම ලොව ප්‍රබල කණ්ඩායමක් ලෙස ශීඝ්‍ර දියුණුවක් ලැබූ බව නොරහසකි.


Categories: ප්‍රවෘත්ති Tags:

සීනි සේවකයන්ට අයවැය සහනයක් තිත්තවෙලා !

November 22nd, 2017 Comments off
පැල්වත්ත සීනි සමාගම හා සෙවනගල සීනි සමාගම පුද්ගලීකරණය කිරීමට 2018 රජයේ අයවැයෙන් වන සූදානම පරාජය කිරීම වෙනුවෙන් අද (22) බුරුත හන්දියේදී (මොණරාගල ප්‍රධාන මාර්ගයේ) විරෝධතා ව්‍යාපාරයක් දියත් කිරීමට එහි වෘත්තීය සමිති එකමුතුව කටයුතු යොදා තිබේ.

මේ වනවිට රජයේ සමාගමක් ලෙස පවතින මෙම ආයතන දෙකම ලාභ
ලබමින් පවතින අතර, මහා පරිමාණයෙන් සේවා සපයන ආයතනයන් බවටද පත්වී ඇතැයි උද්ඝෝෂණයේ සංවිධායකයෝ කියති.

රටේ සීනි කර්මාන්තයම නැවත පරිහානිය කරා ගෙන ගොස් එය විනාශ කිරීමට කිසිසේත් ඉඩ නොදීමට වෘත්තීය සමිති තීරණය කර තිබෙන අතර ඒ වෙනුවෙන් ගත හැකි සෑම පියවරක්ම ගැනීමට සියලූ සේවකයින් එක්ව ඇතැයිද ඔවුහු පවසති.

මෙම ක්‍රියාමාර්ගය සඳහා මෙම සමාගම් හි ක්‍රියාත්මක සියළු වෘත්තීය සමිති පක්‍ෂ, පාට භේදයකින් තොරව එක්වීමට නියමිත බවත්, ඒ අනුව කිසිදු අයුරකින් මෙම ආයතන පුද්ගලීකරණයට හෝ 2011 දී රජයට පවරා ගන්නා අංක 43 දරණ පනත අහෝසි කිරීමට ඉඩ නොතැබීමටද වෘත්තීය සමිති තීරණය කර ඇතැයිද ඔවුහු කියා සිටිති.

2011 අංක 43 දරණ ඌන ක්‍රියාකාරී ව්‍යවසායකයන් හෝ ඌන උපයෝජිත වත්කම් පුනරුදය කිරීමේ පනත මහින්ද රාජපක්ෂ ආණ්ඩු සමයේදී සම්මත කරන ලද්දක් වන අතර, අදාළ පනතට අනුව ප්‍රාථමික කර්මාන්ත අමාත්‍ය දයා ගමගේ මහතාට එවකට අයත්ව තිබූ සීමාසහිත සෙවනගල සීනි සමාගම එම පනත යටතේ පවරා ගනු ලැබීය.

මේ පණත අහෝසි කිරීමට සැරසෙන්නේ ඇමති දයාට අදාළ සමාගම නැවත ලබාදීමට යැයි චෝදනාවක්ද මේවන විට එල්ලවී තිබේ.



Categories: ප්‍රවෘත්ති Tags: